रूपाचे अभंग

१ समचरणदृष्टि विटेवरी साजिरी । तेथे माझी हरी वृत्ती राहो ॥१॥ आणिक न लगे मायिक पदार्थ । तेथे माझे आर्त नको देवा॥ध्रु॥ ब्रम्हादिक पदे दुःखाची शिराणी । तेथे दुश्चित झणी जडो देसी ॥२॥ आणिक न लगे मायिक पदार्थ । तेथे माझे आर्त नको देवा॥ध्रु॥ तुका म्हणे त्याचे कळले आम्हा वर्म । जे जे कर्म धर्म नाशिवंत॥३॥ आणिक न लगे मायिक पदार्थ । तेथे माझे आर्त नको देवा॥ध्रु॥ १ पृष्ठ १ (देहूकर सांप्रदायिक), १ पृष्ठ १ (शासकीय) चित्रकार - भास्कर हांडे २ सुंदर ते ध्यान उभे विटेवरी । कर कटावरी ठेवुनिया ॥१॥ तुळसी हार गळा कासे पीतांबर । आवडे निरंतर तेची रूप ॥ध्रु॥ मकर कुंडले तळपती श्रवणी । कंठी कौस्तुभमणी विराजित ॥२॥ तुळसी हार गळा कासे पीतांबर । आवडे निरंतर तेची रूप ॥ध्रु॥ तुका म्हणे माझे हेची सर्व सुख । पाहीन श्रीमुख आवडीने ॥३॥ तुळसी हार गळा कासे पीतांबर । आवडे निरंतर तेची रूप ॥ध्रु॥ २ पृष्ठ १ (देहूकर सांप्रदायिक), २ पृष्ठ १ (शासकीय) चित्रकार - भास्कर हांडे ३ सदा माझे डोळे जडो तुझे मूर्ती । रखुमाईच्या पती सोयरिया ॥१॥ गोड तुझे रूप गोड तुझे नाम । देई मज प्रेम सर्वकाळ ॥ध्रु॥ विठो माउलिये हाची वर देई । संचरोनी राही हृदयामाजी ॥२॥ गोड तुझे रूप गोड तुझे नाम । देई मज प्रेम सर्वकाळ ॥ध्रु॥ तुका म्हणे काही न मागे आणिक । तुझे पायी सुख सर्व आहे ॥३॥ गोड तुझे रूप गोड तुझे नाम । देई मज प्रेम सर्वकाळ ॥ध्रु॥ ४३३ पृष्ठ ९४ (देहूकर सांप्रदायिक), ३ पृष्ठ १ (शासकीय) ४ राजस सुकुमार मदनाचा पुतळा । रविशशिकळा लोपलिया ॥१॥ कस्तुरी मळवट चंदनाची उटी । रुळे माळ कंठी वैजयंती ॥२॥ मुकुट कुंडले श्रीमुख शोभले । सुखाचे ओतले सकळ ही ॥३॥ कासे सोनसळा पांघरे पाटोळा । घननीळ सांवळा बाइयानो ॥४॥ सकळ ही तुम्ही व्हा गे एकीसवा। तुका म्हणे जीवा धीर नाही ॥५॥ ४३४ पृष्ठ ९४ (देहूकर सांप्रदायिक), ४ पृष्ठ १ (शासकीय) चित्रकार - भास्कर हांडे ५ कर कटावरी तुळसीच्या माळा । ऐसे रूप डोळा दावी हरी ॥१॥ ठेविले चरण दोन्ही विटेवरी । ऐसे रूप हरी दावी डोळा ॥२॥ कटी पीतांबर कास मिरवली । दाखवी वहिली ऐसी मूर्ती ॥३॥ गरुडपारावरी उभा राहिलासी । आठवे मानसी तेची रूप ॥४॥ झुरोनी पांजरा होऊ पाहे आता । येई पंढरीनाथा भेटावया ॥५॥ तुका म्हणे माझी पुरवावी आस । विनंती उदास करू नये ॥६॥ ४३५ पृष्ठ ९४ (देहूकर सांप्रदायिक), ५ पृष्ठ २ (शासकीय) ६ गरुडाचे वारिके कासे पीतांबर । सांवळे मनोहर कै देखेन ॥१॥ बरवया बरवंटा घनमेघ सावळा । वैजयंतीमाळा गळा शोभे ॥२॥ मुकुट माथा कोटी सूर्यांचा झळाळ । कौस्तुभ निर्मळ शोभे कंठी ॥३॥ श्रवणी कुंडले नक्षत्रे शोभती । रत्नप्रभा दीप्ती दंतावळी ॥४॥ ओतीव श्रीमुख सुखाचे सकळ । वामांगी वेल्हाळ रखुमादेवी ॥५॥ उध्दव अक्रूर उभे दोही कडे । वर्णिती पवाडे सनकादिक ॥६॥ तुका म्हणे नव्हे आणिकांसारिखा । तोची माझा सखा पांडुरंग ॥७॥ ४३६ पृष्ठ ९४ (देहूकर सांप्रदायिक), ६ पृष्ठ २ (शासकीय) चित्रकार - भास्कर हांडे

मागील अभंग पुढील अभंग